Седирсултанова Райка, Шалковскойн кIоштарчу, Гребенскера юккъерчу ишколин нохчийн меттан а, литературин а хьехархо.
Седирсултанова Райка йина 1968-чу шарахь Ножай-Йуьртан кIоштан Татай-Отар йуьртахь.Оццу йуьртахь 1975-чу шарахь хьалхарчу классе деша а йахана. Меттигерчу ишколера дешна йаьлла 1983-чу шарахь. Цу шарахь, Гуьмсерачу хьехархойн училище деша йахана иза. I987-чу шарахь кхиамца чекхйоккху цо и училище.
1987-чу шарахь шен йуьртахь йуьхьанцарчу классашкца д1аболабо цо шен къинхьегаман некъ. Оцу белхан меттигехь кхаа шарахь болх бо цо.
1990-чу шарахь Гребенскерчу юккъерчу школехь нохчийн меттан а, литературин а хьехархочун болх бо.
Республикехь, кIоштахь, ишколашкахь хуьлучу олимпиадашкахь,
къийсадаларшкахь жигара дакъалаьцна дешархоша, тоьлла хаарш гайтарна толамш баьхна меттигаш а йу.
Белхаш билгалбина Дешаран-Iилманан министерство, Нохчийн пачхьалкхан правительство, кIоштан дешаран куьйгалхочо, ишколин куьйгалхочо, бераш кхетош-кхиорехь Сийлаллин граматашца.
Ненан мотт хьехаран болх тIехьажийна бу тIекхуьу къона тIаьхье дайн ламасташца, къоман гIиллакх-оьздангаллийца, ийман долуш хилийтарна.
«Ненан меттан урокашкахь сайн коьрта ши декхар ду аьлла хета суна: ненан матте дешархойн безам кхоллар; биллина ненан мотт цаьрга бийцийтар. Дешаран декъехь ненан маттахь хьехар деккъа кхетар сов хилийтарна эшна Iаш дац. Цуьнан марзонца, и безаш кхиийна волу дешархо, дешна ваьллачул тIаьхьа и бийца хууш а, лууш а хила веза. И бийца хууш а, лууш а хилча бен цо и буьйцур а бац. Бийцича бен и кхуьур бац, бехар а бац, тIахьене дIакховдо ненан мотт хир бац.
Ненан мотт кхио а, цуьнан сий-пусар дан а, дайх дисина оьзда гIиллакхаш лардан а, и дерриге а тIекхуьучу къоначу тIаьхьене доккха, деза совгIат дина дIадала а, Дала хьекъал а, хьуьнар а, могашалла а лойла вайна»!