22-г1а урок. Урокан ц1е: «Дош а, предложени а». 2 класс.
—Маршалла ду шуьга, хьоме дешархой!
-Вай тахана юха а вовшахкхийти нохчийн меттан рог1ерчу урокехь.
-Дала беркате дойла вайн цхьанакхетар.
-Таханлерачу урокехь вай дуьйцур ду: дош стенах олу, предложени х1ун ю.
—Дешнаша х1уманаш гойту:
Слайд:
х1ун? малх, шовда, буьйса;
мила? йо1, к1ант стаг;
-Церан билгалонашка хьовсур ду вай:
Слайд:
муха?бовха малх, шийла шовда, 1аьржа буьйса, хаза йо1, дика к1ант, воккха стаг;
дар: х1ун до? йог1у, воду, доьшу.
-Дешнаш аьзнех лаьтта. Аьзнаш йозанехь элпашца билгалдо.
-Дешнаш дешдакъошка декъало.
-Х1ора дашехь мукъа аз доллучул дешдакъа хуьлу:
Слайд:
к1ант, церг, хьос-там, на-на, де-шар-хо, тал-лар-хо.
-Предложени- иза кхочушхилла яьлла ойла гойтучу дешнех олу.
—Предложенино цхьана х1уманах лаьцна хаам бо:
Слайд:
Аьхка арахь йовха хуьлу.
К1анта нанна совг1ат дира.
—Аларан 1алашоне хьаьжжина предложенеш хуьлу:
Слайд:
дийцаран (.),
хаттаран(?),
айдаран(!)
-Цхьана г1уллакхах я хиламах лаьцна хаамбечух дийцаран предложени олу . И чекхъяьлча, т1адам(.) буьллу.
Слайд:
Бераша школехь дика доьшу.
-Шен чулацамца хаттаран маь1нехь йолчух хаттаран предложени олу, цуьнан чаккхенга хаттаран хьаьрк (?) дуьллу.
Слайд:
Мохьмад, хьо соьца ловза вог1ий?
-Аз ойуш, ч1ог1а олучу предложених айдаран предложени олу, цуьнан чаккхенга айдаран хьаьрк (!) дуьллу.
Слайд:
1алелай, и дукха олхазарш!
—Ткъа х1инца 1амийначу урокан мах хадош, вешан хаарш
толлуш, т1еч1аг1дарш кхочушдийр ду вай:
-Х1окху дешнех предложени х1оттае:
Слайд:
Со, классан, дешархо, шолг1ачу, ву.
Слайд: (нийса иштта хир ду)
Со шолг1ачу классан дешархо ву.
—Дукха дешнаш хьанна хаьа хьовсий вай?
-Стиглахь, лаьттахь, хи чохь ган йишйолчу х1уманийн ц1ераш яха.
Слайд:
Стиглахь: малх, бутт, седарчий, мархаш.
Лаьттахь: ц1ено, дитт, некъ, т1улг.
Хи чохь: ч1ара, пхьид, хин седа.
-Кхин а цхьа т1едиллар кхочушдийр ду вай:
-Т1ера схьаязъе предложенеш:
Предложенеш х1окху рог1аллехь д1аязъе:
1-дийцаран предложени;
2-г1а-хаттаран предложени;
3-г1а- айдаран предложени.
Слайд:
Хьо школе вог1ий?
Вайна вешан мохк беза.
Ма хаза ду арахь!
Слайд: нийса иштта хир ду.
Вайна вешан мохк беза.
Хьо школе вог1ий?
Ма хаза ду арахь!
-Тахана вай шуьца дош а, предложени а х1ун ю 1амий.
— Со теша, х1окху уроках аш пайдаэцна хиларх.
-Дала нохчийн мотт 1аморехь, хаарехь сов дохийла вай!
-Цу т1ехь вайн урок чекхъели.
1одика йойла! Марша 1ойла!
Пайдаэцна литература:
Солтаханов Э.Х.,СолтахановИ.Э.,Эдилов С.Э.«Нохчийн мотт-2 класс» Соьлжа-Г1ала АО«ИПК» «Грозненский рабочий»-2016ш. «Стела1ад» журнал.
Автор:Мусаев Хамзат Ахмедович МБОУ «СОШ №27» г.Грозный.
ТЕСТЫ:
Масаэлпдунохчийналфавитехь
45
33
47
49 +