2 класс
Урок 18
Нохчийн меттан интернет урокан х1оттам.
Урокан ц1е: «Ев», «ов», «аьв» юкъадог1у дешнаш нийсаяздар.
-Де дика дойла шу, хьоме дешархой! Шу урокана кечам бина девллехь, вай д1айолор ю рог1ера нохчийн меттан урок.
Вай тахана урокехь шуна довзуьйтур ду ев, ов, аьв юкъадог1у дешнаш а, церан нийсаяздар а.
-Тидам а беш, д1адеша дешнаш.
Слайд:
Тхевнаш говр
эвлахь ловзар
кевнаш эвхьаза
совг1ат къовса
б1аьвнаш ж1ов,
б1овдов.
-Т1ера схьаязде, В элпана хьалхарчу мукъачу элпана к1ел сиз хьакха. Аша тидам бина хир бу, мукъа аьзнаш в-на хьалха тайп-тайпана хезаш хиларан.
Слайд:
Нохчийн маттахь мукъа аз в-на хьалха тайп-тайпана хаза тарло. В-на хьалха а я о хезаш хилча, о яздо: ж1ов, говр.
Оь хезаш хилча, е, э яздо: девзиг, эвла. Амма хь-ний, 1-ний т1ехьа аь яздо: б1аьвнаш, ж1аьвнаш, хьаьвда.
-Х1инца вай ловзаран кепаш д1ахьур ю.
1. «Керла дош кхолла».
-Хьалхара элп хийца а хуьйцуш, керла дешнаш кхуллур ду вай:
Слайд:
ков, …ов, …ов, …ов,…ов, …ов, …ов
Слайд: ( Нийса иштта хир ду)
ков, дов, лов, сов,тов, 1ов, чов.
-Оцу дешнашкахь в элпана хьалха х1ун хеза вайна? (О аз хеза).
[О] аз хеза, цундела вай оцу дешнашкахь в-на хьалха о элп яздо.
2. «Совнаха дешнаш караде».
Слайд:
Девзиг, кевнаш, чхьаьвриг, девнаш, чевнаш, хьаьвда, ц1евнаш, б1аьвнаш, тхевнаш.
Чхьаьвриг
Хьаьвда } —Х1унда ду и дешнаш совнаха?
Б1аьвнаш
-Вукху дешнашкахь в-на хьалха е яздо, ткъа оцу дешнашкахь хь-ний, 1-ний т1ехьа аь яздо.
3. «Суьртан метта дош ала».
Слайд:
-1емаш ву со тилла (тхов).
-Хьостамна т1е етташ (ж1ов).
— Х1ун элп яздина оцу дешнашкахь в-на хьалха? (о)
-1амийнарг т1еч1аг1деш, д1аязде дешнаш :
— Шайна юккъехь ев(эв), ов, аьв долу дешнаш, к1ел сих хьакхий, билгалдаха.
Слайд:
Эвла, йо1, зезаг, ц1ов, ж1аьла, хьовла, хьач, кховр, н1аьна, чхьаьвриг, девзиг, моза, н1аьвла, кхор, ткъов, эса, Эвтара, Эвлияъ.
-Дагахь латтае церан нийсаязъяран бакъонаш.
-Цу т1ехь вайн рог1ера нохчийн меттан урок чекхйолу.
-1одика йойла. Марша 1ойла!
Пайдаэцна литература:
1 Э.Х. Солтаханов. И. Э. Солтаханов.Нохчийн мотт 2 класс. Соьлжа-г1ала АО «ИПК» Грозненский рабочий»-2016 ш.
2 С.Э. Эдилов. «Ловзуш 1ема» (Юьхьанцарчу классийн хьехархошна методически пособи) ГУП «Книжное издательство» -2007 ш.
Урок кечйинарг нохчийн меттан хьехархо: Дашаева Аминат Салаудиновна