2 класс урок№28 Предложени

2 класс. № 28

Урокан ц1е: Предложени.

-Маршалла ду шуьга, хьоме дешархой!

-Вай х1инца д1айолор ю рог1ера нохчийн меттан урок.

-Тахана вайна хуур ду, стенах олу предложени.

Слайд:

-Адамийн кхочушхилла ойла гойтуш, вовшашца уьйр йолуш цхьаьнакхеттачу дешнех я оццу маь1ница лелачу шакъаьстинчу дашах предложени олу.

Слайд:

Суьйре. Малх чубуза гергабахана. Юьртахойн бежнаш, уьстаг1ий ц1а оьхуш ду.

-Предложени дешнех лаьтта.

Слайд:

Предложени хуьлу: дийцаран, хаттаран, айдаран.

Предложени язъян йолайо доккхачу элпаца.

Предложени чекхъяьлча т1адам буьллу я маь1ница йог1у хьаьрк (!?) х1оттайо.

Слайд:

Масала:

Бераш деша доьлху.

Абу, хьо тхоьга вог1ий?

Ма хаза бу вайн Даймохк!

— 1пмийнарг т1еч1аг1деш цхьа т1едиллар кхочушдийр ду  вай.

-Хьовса кху дийцаран кийсаке, оьшучохь т1адамаш а дохкуш, схьаязъе предложенеш.?

Слайд:

Вехаш вара воккхастаг ша санна къена ц1ийннана а яра цуьнан тайна, бертахь дехара и шиъ воккхачу стага денна гихь хьуьнхара дечиг кхоьхьура, ткъа йоккхачу стага, лулахошна и д1а а духкуш, цунах шайна юург латтайора иштта д1анисйора цара шайн къоьлла

— Т1едиллар нийса кхочушдинехь иштта  хила деза.

Слайд:

Вехаш вара воккхастаг.  Ша санна къена ц1ийннана а яра цуьнан.  Тайна, бертахь дехара и шиъ.  Воккхачу стага денна гихь хьуьнхара дечиг кхоьхьура, ткъа йоккхачу стага, лулахошна и д1а а духкуш, цунах шайна юург латтайора.  Иштта д1анисйора цара шайн къоьлла.

-Х1инца х1окху дешнех предложени х1отто хьовсий вай .

Слайд:

Д1айоьлху, махка, бовхачу, г1арг1улеш, гуьйранна.

— Нийса иштта хир ду:

Слайд:

Г1арг1улеш гуьйранна бовхачу махка д1айоьлху.

-Х1окху суьрте а хьовсуш дийцар х1отто  хьовсий вай:

Слайд:

— Гергарчу хьесапехь дийцар иштта хила мега:

-1аьнан хан ю. Бераш арахь ловзуш ду. Т1едог1уш   ло ду. Цхьаберш лайн мижаргех ловзуш бу, вуьйш лайн баба еш бу. Царна дехьо салазаш т1ехь хехкалуш а ду бераш. Берийн самукъадолу.

—  Вай дийцарехь ялийна предложенеш, шайн аларан 1алашоне хьаьжжина  дийцаран маь1нехь ю.

-Тахана урокехь вайна хии дийцаран предложени чекхъяьлча т1адам буьллуш хилар, кхочушхилла ойла гойтуш, вовшашца уьйр йолуш цхьаьнакхеттачу дешнех я оццу маь1ница лелачу шакъаьстинчу дашах предложени олуш хилар а.

-Кху т1ехь вайн урок ерзор ю вай.

— 1одика йойла шун. Марша 1ойла!

                                                                               Дудаева Ирса Хожаевна.

Close
Яндекс.Метрика