2класс. Урок№ 11.
Тема: Нохчийн абат.
-Маршалла ду шуьга, хьоме дешархой!
-Вай юха а д1айолор ю рог1ера нохчийн меттан урок.
— Тахана вайна хуур ду абат бохург х1ун ду, алфавит х1ун ю. Иштта царах х1унда олу.
Слайд:
-Нохчийн абатехь (алфавитехь) 49 элп ду. Х1ора элпан шен ц1е ю.
| А а а | Аьаь аь | Бб бэ | Вв вэ | Гг гэ | Г1г1 г1а | Дд дэ | Ее е | Ёё йо | Жж же | Зз зе |
| Ии и | Йй й | Кк ка | Кхкх кха | Къкъ къа | К1к1 К1а | Лл эль | Мм эм | Нн эн | Оо о | Оьоь оь |
| Пп пэ | П1п1 П1а | Рр эр | Сс эс | Тт тэ | Т1т1 т1а | Уу у | Уьуь уь | Фф эф | Хх ха | Хьхь хьа |
| Х1х1 х1а | Цц цэ | Ц1ц1 ц1а | Чч ча | Ч1ч1 ч1а | Шш ша | Щщ ша | Ъ ч1ог1а хьаьрк | Ы ы | Ь к1еда хьаьрк | Ээ э |
| Юю ю | Юьюь юь | Яя я | Яьяь яь | 11 1а |
-Ч1ог1а мехала а, оьшуш а ду элпийн рог1алла дагахь латтор. Иза бен а доцуш х1оттийна яц, аьзнаша (элпаша) вай буьйцучу меттехь, дечу къамелехь дакъалацаре хьаьжжина х1оттийна ю.
Слайд:
Абат (алфавит) – иза цхьана кепехь д1анисдина элпаш ду. Абатехь х1ора элпан шен меттиг ю.
-Массо а меттан шен абат ю –аьзнаш билгалден элпийн гулар. Ткъа хаьий шуна, абат боху дош муха кхолладелла? Юста 1арбийн а, нохчийн а хьалхарчу элпийн ц1ерш.
Слайд:
А алиф
Б ба
Т та
-1арбийн хьалхарчу кхаа элпан ц1ерех кхолладелла дош ду абат.
-Алфавит боху дош а грекийн хьалхарчу альфа, бета ц1е йолчу шина элпах кхоьллина ду.
Слайд:
Х1етал-метал хаийла шуна
Ду и тамашена г1утакх,
Кхочушдо цо доккха г1уллакх,
1алашдо цо нохчийн элпаш-
Уьш дагардан тоац п1елгаш,
Х1ора элпан ю шен к1ара,
Цу чуьра и далац ара.
Х1ора элпан ду шен амат-
Олу цунах, бераш, …. . (абат)
-Хии вайна иза х1ун ю. Иза абат ю.
-Х1инца, 1амийнарг т1еч1аг1деш цхьа т1едиллар кхочушдийр ду вай.
Абатан рог1аллехь схьаязде х1ара дешнаш.
Слайд:
Ж1ов, аьрзу, кхокха, ц1азам, бад, ворта, г1аз, диг, етт, ёлка, к1еза, зу, маьнга, говр, юьхк, 1ахар, га, ага.
-Болх нийса бинехь иштта хила беза:
Слайд: Нийса иштта хир ду
Ага, аьрзу, бад, ворта, га, говр, г1аз, диг, етт, ёлка, ж1ов, зу, кхокха, к1еза, маьнга, ц1азам, юьхк, 1ахар.
-Х1ара дагахь латтаде.
Слайд:
Алфавитан рог1аллехь язйо фамилеш а, д1анисйо библиотекера книгаш а.
Дошам т1ера дешнаш а алфавитан рог1аллехь д1анисдо.
— Кху т1ехь вайн урок чекхйолу.
-1одика йойла шун, марша 1ойла.
Пайдаэцна литература:
Абат. Солтаханов Э.Х. Солтаханов И.Э. Соьлжа- Г1ала. АО « ИПК «Грозненский рабочий» -2016
Урок кечйина: Хьехархо СОШ № 49.
Хасаева Зара Кюровна.