3 класс. Урок №25 «Къамелан дакъош»

3 класс Урок – 25-гIа

Къамелан дакъош. (Урок кхетор)

— Маршалла ду шуьга, хьоме дешархой! ДIахьур ю вай-вешан рогIера урок.

— Тахана вай довзуьйтур ду шуна къамелан дакъош.

 — Вайна хууш ма-хиллара, вайн къамел дешнех лаьтта. Ткъа дешнаш декъало яккхийчу тобанашка – къамелан дакъошка: цIердешнашка, билгалдешнашка, хандешнашка, дештIаьхьенашка, иштта дIа кхин а. Нохчийн маттахь коьртачу къамелан дакъойх ду цIердош, билгалдош, хандош.

Слайд:

ХIуманаш билгал а еш, мила? муьлш? хIун? бохучу хаттаршна жоп лучу дешнех цIердешнаш олу. Масала: нана, нах, къолам, малх.

ХIуманийн билгало а гойтуш, муха? бохучу хаттарна жоп лучу дешнех билгалдешнаш олу. Масала: хаза, лекха, шийла.

ХIуманийн дар я хилар гойтучу дешнех хандешнаш олу. Цара хIун до?хIун дина?хIун дийр ду? иштта дIа кхечу а хаттаршна жоп ло: догIу, олу, яздийр ду, аьлла.

— ХIинца дIайоьшур ю вай предложенеш.

Слайд:

Дашо гуьйре чекхъели.

Шийла денош тIекхечи.

Кегийра догIанаш дуьйладели.

— ТIедиллар. ЦIердешнашна кIел цхьа сиз хьакха, хандешнашна – шиъ, билгалдешнашна тулгIе сиз хьакха.

Нийса жоп.  (

Слайд:

Дашо гуьйре чекхъели.

Шийла денош тIекхечи.

Кегийра догIанаш дуьйладели.

Слайд:

Дош муьлха къамелан дакъа ду хаархьама, хаттар а хIоттош, цо хIун билгалдо хаа деза: хIума, хIуманан билгало, хIуманан дар я хилар.

— ДIаязде къолам, стаг, кIелахь, хаза, доьшу, тIехь, гIутакха чохь, лекха боху дешнаш.

— Къамелан дакъошца къастаде уьш.

Слайд:

Къолам, стаг, кIелахь, хаза, доьшу, тIехь, гIутакха чохь, лекха.

— Муьлха дешнаш диси вайн кIел сиз хьакхаза

Слайд:

КIелахь, тIехь, чохь – бохучу дешнашна кIел сиз ца хьаькхна.

И дешнаш цIердош, билгалдош, хандош санна къамелан дакъа дештIаьхье ду.

Слайд:

ДештIаьхье предложенин меже ца хуьлу. Цо предложенерчу дешнашна юккъехь уьйр латтайо.

Масала: Дитташ тIехь ло Iуьллу.

— Муха хийцало дешнаш?

Слайд:

ЦIердешнаш а, цхьадолу билгалдешнаш а, хандешнаш а терахьашца хийцало.

Слайд:

Цхьаллин терахь                Дукхаллин терахь

нана                                     наной

йоккха                                 баккхий

вогIу                                    богIу

— Муха хуур ду дош муьлхачу терахьехь ду?

Слайд:

Цхьаллин терахьехь цIердашо цхьа хIума билгалйо.

Масала: туьрк – туьркаш, зезаг – зезагаш, бер – бераш.

Цхьаллин терахьехь билгалдашо цхьана хIуманан билгало гойту.

Масала: йоккха гIала – яккхий гIаланаш, жима дитт – кегий дитташ.

Цхьадолу хандешнаш, шайца уьйр йолчу цIердешнашка хьожжий, классашца а, терахьашца а хийцало.

Масала: кIант воьду – йоI йоьду, кIант воду — кIентий бовду.

— ХIинца вайн хаарш тIечIагIдеш, кхин цхьа тIедиллар а кхочушдийр ду вай.

— ХIокху дешнех кхо предложени хIоттае, къамелан дакъош билгалдаха.

Слайд:

Кечлуш, тхан, олхазарийн, бераш, денна, школан, ду.

ЦIаьлгаш, до, аьхна, бераша.

Кеста, дитташ, гур, цIаьлгаш, тIехь, ду.

Нийса жоп.

Слайд:

Тхан школан бераш олхазарийн денна кечлуш ду.

Бераша аьхна цIаьлгаш до.

Кеста дитташ тIехь цIаьлгаш гур ду.

— Хьоме дешархой, хIокху урокехь вайна девзи къамелан дакъош. Евзи церан цхьайолу билгалонаш.

— Царах кIорггера болчу кхетамех рогIерчу урокашкахь дуьйцур ду вай.

— Кху тIехь вайн таханлера урок чекхйолу.

— Шун Iодика йойла. Марша Iойла.

Юсаева Зарина сош №I8

Close