Урокан ц1е: Ц1ердешнийн классаш.
Де дика хуьлда шун, хьоме дешархой! Мотт — иза Дала вайна делла деза совг1ат ду. Мотт ца хилча, вайга вешан дагара дийцалур дацара, хаийталур дацара цхьаьнгге а. Маттехула ю адамаша вовшашца лелош йолу юкъаметтигаш, гергарлонаш, вайнехан г1иллакхаш а. Цундела, Далла хастам а беш, вешан мотт дика 1амо а, иза дика хаа а беза вайна.
— Хьовсур ду вай х1окху предложенешка:
Слайд:
1.Сан ваша г1алахь вехаш ву. Майрбекан вежарий дика белхаш беш бу. 2.Адаман йиша хьелийозархо ю. Русланан йижарий хорехь дакъалоцуш бу. 3.Со т1ехууш долу г1ант дика ду. Иштта г1анташ дуккха а ду классехь. 4.Тхан школа хаза ю. Иштта школаш дуккха а ю вайн махкахь. 5. Орган чохь даккхий ч1ерий ду. Ас лаьцнарг жима ч1ара бу.
——
-Шина б1ог1амалге схьаяздер вай билгалдаьхна дешнаш:
Слайд:
Кеп: ваша ву вежарий бу
йиша ю йижарий бу
г1ант ду г1анташ ду
школа ю школаш ю
ч1ара бу ч1ерий ду
——
-Х1ун дешнаш ду вай схьаяздинарш? (Ц1ердешнаш ду)
-Муха хийцина ду шина б1ог1амалгера ц1ердешнаш? (терахьашца хийцина ду)
-Кхин х1ун дешнаш го вайна ц1ердешнашца? (ву, бу, ю, ду)
—-
-Тахана вай 1емар ду ц1ердешнийн классаш къасто.
Слайд:
Ц1ердешнаш билггалчу классашка д1анисдина ду. Уьш муьлхачу классехь ду хаа тарло ву, ю, бу, ду классийн гайтамийн г1оьнца.
—Х1ара дешнаш кхаа б1ог1амалге д1асадоькъур вай кху кепара:
Слайд:
Божарийн Зударийн Кхийолу класс класс классаш
Ваша, ручка, ч1ерий, вежарий, дешархо, ч1ара, кор, белхалой, кораш, белхало, нана, латта, б1аьрг, наной, латтанаш, б1аьргаш, гезарий, газа, ручканаш, йиша, т1улг, къолам, мел, къоламаш,т1улгаш, мелаш, йижарий
—Толлур вай
Слайд:
Божарийн Зударийн Кхийолу класс класс классаш
ваша ву нана ю ручка ю
вежарий бу наной бу ручканаш ю
дешархо ву йиша ю ч1ара бу
дешархой бу йижарий бу ч1ерий ду
белхало ву кор ду
белхалой бу кораш ду
латта ду
латтанаш ду
б1аьрг бу
б1аьргаш ду
газа ю
гезарий ю
ручка ю
ручканаш ю
т1улг бу
т1улгаш ду
мел бу
мелаш ду
къолам бу
къоламаш ду
-Тидам бе цхьаллин а, дукхаллин а терахьерчу ц1ердешнийн классийн гайтамийн.
Слайд:
Цхьаллин терахьехь ву, дукхаллин терахьехь бу боху классан гайтамаш х1итто тарлуш долу ц1ердешнаш божарийн классехь ду.
Цхьаллин терахьехь ю, дукхаллин терахьехь бу боху классан гайтамаш х1итто тарлуш долу ц1ердешнаш зударийн классехь ду.
Божарийн а, зударийн а классашкахь доцу ц1ердешнаш кхийолчу классашкахь ду. Церан гайтамаш хуьлу: ду – бу, ю – ю, ду – ду, бу – ду.
— Х1ара дешнаш, оьш-оьшу классан гайтамаш а бохкуш, д1аязде.
Хьостам …, говр …, хьозий …, пондар …, ялта …, пхьераш …, кхор …, г1аз …, мача …, хьоза …, пхьар …, пондар …, мехкарий …, йо1 … .
——
Болх иштта бина хила беза
Слайд:
Хьостам бу, говр ю, хьозий ду, пондар бу, ялта ду, пхьераш бу, кхор бу, г1аз ю, мача ю, хьоза ду, пхьар ву, пондар бу, мехкарий бу, йо1 ю.
— Х1окху урокехь вайна евзи ц1ердешнийн классаш. Кхид1а а нохчийн мотт 1аморехь кхиамаш хуьлда шун.
1одикайойла. Марша 1ойла.